“-O 29 de setembro pasado -explicou o detective-, cometeuse un roubo por un total de 55.000 libras esterlinas… e a descripción que temos do autor dese delito coincide exactamente coa do seu amo, Phileas Fogg.
-Non é certo! -defendeuse o criado-. O meu amo é o home máis honesto do mundo.
Fix moveu a cabeza.
-Vostede non o coñecía, pois entrou ó seu servizo o mesmo día que se cometeu o roubo…”
Fragmento de “A volta ao mundo en 80 días”. Jules Verne.
Arquivado en A volta ao mundo en 80 días
Como xa sabedes, o luns 1 de outubro reunímonos o club de lectura BiblioTea. Ás 14:30 despois das clases, na biblioteca.
A reunión xirará en torno ó clásico de Jules Verne “A volta ao mundo en 80 días”. Para os que queirades información sobre este autor, picando sobre o nome tedes acceso a unha páxina na que tedes unha manchea de información desde a súa biografía, bibliografía (da que coñecemos moitos títulos, pero descoñecemos ou coñecemos menos outros moitos), adaptacións das súas obras (foi un dos autores máis adaptados na historia do cine), ata caricaturas e fotografías e unha colección de portadas das súas obras. Tedes tamén unha biblioteca virtual con 53 textos da obra deste autor.
Deixámosvos tamén un xogo co que podedes facer a vosa volta ao mundo e practicar inglés. Picade neste enlace.
Outras curiosidades sobre o libro ou as súas adaptacións:
E isto é todo, vémonos o luns.
Arquivado en A volta ao mundo en 80 días, Recomendacións
Na biblioteca do IES Val do Tea comezamos un curso máis coas reunións do Club de lectura.
Este curso temos un proxecto que se chama “A volta ao mundo en 8 libros” (picando sobre o título tedes acceso ó proxecto). Comezaremos a reunión inicial, o próximo luns 1 de outubro, intercambiando opinións sobre a lectura o clásico de Jules Verne “A volta ao mundo en 80 días” (aquí vos vai un enlace a un arquivo PDF onde podedes atopar unha tradución da obra ó castelán. Na biblioteca non temos exemplares para todos, polo que os que optedes por lela en papel, facédoa canto antes para deixarlles os libros ós compañeiros, se non sempre podedes optar por lela online)
A partir deste libro faremos a nosa propia viaxe a traves de 8 libros que xa temos elixidos para as próximas sesións (podedes ver os títulos ó final do proxecto), libros que nos levarán ó deserto do Sahara, ó Marrocos, ó Nepal, a Nova Iorke, a algún lugar de Francia, de Holanda, etc. Só tedes que achegarvos ó club de lectura e incluirémosvos na viaxe.
As reunións, como sabedes os que xa asististes ó club de lectura o curso pasado, serán o primeiro luns lectivo de cada mes entre as clases da mañá e da tarde. Teredes que traer o bocata, a fiambreira ou o que vos pareza oportuno, ou ben encargarllo a Pili, na cafetería.
Ós que asististes á reunión informativa do venres 21, xa vos entregamos persoalmente a autorización que tedes que levar ás vosas casas e traer asinada polos vosos pais. Ós que non asististes a esa reunión, pero queredes participar no club, aínda estades a tempo de facelo poñéndovos en contacto con Esmeralda Quiroga, profesora de lingua e literatura castelán, ou Adelia Troncoso, profesora de latín (buscádenos polo instituto). Ós pais e nais que queirades información sobre esta actividade, dicirvos o mesmo: poñédevos en contacto con calquera unha destas dúas profesoras (preferiblemente os xoves á 2ª hora, de 9:35 a 10:25, en calquera outro momento pedídelle ós conserxes que nos localicen nunha hora na que non teñamos clase). Tamén podedes poñervos en contacto, poñendo no asunto “Club de lectura” no enderezo adeliatroncoso@hotmail.com.
Xa lles comentamos ós alumnos que asistiron á reunión inicial que poden vir á sesión do club acompañados dalgún compañeiro, amigo, familiar… que teña lido tamén o libro, ou cando menos unha parte. Os pais/nais tamén estades convidados a asistir a algunha reunión. Se queredes ler o libro cos vosos fillos e logo participar, tedes a listaxe dos títulos ó final do proxecto. Tamén podedes facer comentarios no blog nas entradas que iremos poñendo relativas a cada sesión.
Este blog funcionará durante este curso coma diario de viaxe, polo que está aberto a calquera comentario que creades oportuno sobre o libro e/ou país que nos ocupe cada sesión.
Iremos facendo cando menos unha entrada previa á reunión e outra posterior. Na primeira daremos suxestións para comentar arredor do libro, entre outras cousas. Na posterior poñeremos fotos da reunión, impresións, comentarios que xurdiron e outras cousas que se nos vaian ocorrendo.
Nesta primeira deixámosvos información xeral e os enlaces ó proxecto e ó texto de Verne
Arquivado en A volta ao mundo en 80 días, Recomendacións
Club de lectura BiblioTea 